В лето 6904 (1396) преставился Стефан епискуп Перьмскый, месяца апреля 26, в Препловенье праздник в среду. Си бо святый святитель, новыя апостол Пермьскыя земля, учитель и просветитель душам их, преложи им грамоту с Рускыа на Пермскую грамоту, и веру утверди, и грамоте их изучи. Се бо блаженный епископ Стефан, божий человек, живяше посреде неверных человек, ни Бога знающих, ни закона ведящих, молящиеся идолом, огню, и веде, и каменю, и золотой бабе, и кудесником, и велехвом, и древью. А се живущеим около Перьми имена местом и странам и землям иноязычным: Двиняне, Устюжане, Велыжане, Вычегжане, Пенежане, Южане, Сирнане, Галичане, Вятчане, Лопь, Корела, Югра, Печера, Вогуличи, Самоеды, Пертасы, Пермь великая, Гамаль Чюсовая. Река же первая, именем Вымь, впаде в Вычегду; другая река Вычегда, объодяще всю землю Пермскую, потече к северней стране и паде в Двину, ниже Устюга 40 верст; река же третья Вятка потече с другую сторону Перми и вниде в Каму реку; сиа же река Кама обходяще всю землю Пермьскую, по се бо реце мнози языци сидят, и потече на уг в землю Татарскую и впаде в Волгу, ниже Казани 60 верст.
Софийская первая летопись //Труды Вятской Ученой Архивной Комиссии - Вятка 1905 г., с.24-25 | |
| |
Просмотров: 430 | | |
Всего комментариев: 0 | |